വനിത ശിശു വികസന വകുപ്പും അഴൂർ ഗ്രാമ പഞ്ചായത്തും സംയുക്തമായി സംഘടിപ്പിച്ച, ഭിന്നശേഷി കുട്ടികളുടെ കലാ -കായിക മാമാങ്കം ‘നക്ഷത്ര തിളക്കം’ വി. ശശി എം. എൽ.എ ഉദ്ഘാടനം ചെയ്തു. പഞ്ചായത്ത് പരിധിയിലെ നിരവധി കുട്ടികളാണ് മത്സരങ്ങളിൽ പങ്കെടുത്തത്. വാശിയേറിയ കായിക മത്സരങ്ങളിൽ പങ്കെടുത്തവരെ പ്രോത്സാഹിപ്പിക്കാനായി രക്ഷിതാക്കളോടൊപ്പം പ്രദേശവാസികളും അണിനിരന്നു.
വേദിയിൽ പരിമിതികൾ മറന്ന് കുട്ടികൾ
കലാപ്രകടനങ്ങളിൽ മാറ്റുരച്ചു. വിവിധ ഇനങ്ങളിൽ പങ്കെടുക്കാനുള്ള കുട്ടികളുടെ ആവേശവും രക്ഷിതാക്കളുടെ താല്പര്യവും കണ്ടുനിന്നവരുടെ മനം നിറച്ചു. മത്സരങ്ങളിൽ പങ്കെടുത്ത എല്ലാ കുട്ടികൾക്കും പ്രോത്സാഹന സമ്മാനങ്ങൾ പഞ്ചായത്ത് ഒരുക്കിയിരുന്നു. അഴൂർ ഗ്രാമ പഞ്ചായത്ത് പ്രസിഡന്റ്‌ അനിൽ കുമാറിന്റെ നേതൃത്വത്തിലാണ് പരിപാടി സംഘടിപ്പിച്ചത്. വാർഡ് മെമ്പർമാർ, ഐ. സി. ഡി. എസ് പ്രവർത്തകർ, വിവിധ രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.
