ചിറയിൻകീഴ് : ട്രെയിനിൽ കടത്തിക്കൊണ്ടുവന്ന മയക്കുമരുന്നുമായി യുവാവ് പിടിയിൽ. ചിറയിൻകീഴ് സ്വദേശി സൂരജ് (23) ആണ് പിടിയിലായത്. ഇയാളിൽ നിന്നും 25 ഗ്രാം എംഡിഎംഎ ആർപിഎഫ് സംഘം പിടിച്ചെടുത്തു. ബെംഗളൂരുവിൽ നിന്നുമാണ് ഇയാൾ മയക്കുമരുന്ന് വാങ്ങി ട്രെയിനിൽ കടത്തികൊണ്ടുവന്നത്.
മൈസൂരു-കൊച്ചുവേളി എക്സ്പ്രസ്സിൽ കൊച്ചുവേളി റെയിൽവേ സ്റ്റേഷനിലെത്തിയ ഇയാൾ മയക്കുമരുന്നു വാങ്ങാനുള്ള ആളെയും കാത്ത് റെയിൽവേ യാർഡിനു സമീപം ഒളിച്ചു നിൽക്കുകയായിരുന്നു. ഇത് ശ്രദ്ധയിൽപ്പെട്ട ആർപിഎഫ് ഉദ്യോഗസ്ഥന് സംശയം തോന്നി. കൂടുതൽ ഉദ്യോഗസ്ഥർ എത്തിയപ്പോൾ സൂരജ് ഓടി രക്ഷപ്പെടാൻ ശ്രമിച്ചെങ്കിലും ആർപിഎഫ് സംഘം ഓടിച്ചിട്ട് പിടികൂടുകയായിരുന്നു.
