ആധുനികസാങ്കേതിക വിദ്യയുടെ കരുത്തില്‍ അരുവിക്കരമണ്ഡലത്തില്‍ നവീകരിച്ച റോഡുകള്‍ ഗതാഗതത്തിനായി തുറന്നു. ബി.എം ആന്‍ഡ് ബി. സി നിലവാരത്തില്‍ നവീകരിച്ച മൂന്ന് റോഡുകള്‍ പൊതുമരാമത്ത്, ടൂറിസം വകുപ്പ് മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്തു. മൈലോട്ടുമൂഴി-ചായ്ക്കുളം റോഡ്, നെട്ടിറച്ചിറ-വെള്ളനാട്-പൂവച്ചല്‍ റോഡ്, വെള്ളനാട്-കണ്ണമ്പള്ളി-ചേപ്പോട്-മുളയറ റോഡ് എന്നിവയാണ് നവീകരിച്ചത്. 20 കോടിയിലധികം രൂപയാണ് മൂന്ന് റോഡുകളുടെ നവീകരണത്തിനായി ചെലവായത്.
മികച്ച ഗുണനിലവാരമുള്ള റോഡുകൾ യാഥാർത്ഥ്യമാക്കുകയെന്ന ജനങ്ങൾക്കുള്ള ഉറപ്പാണ് സർക്കാർ പാലിക്കുന്നതെന്നു മന്ത്രി പി.എ മുഹമ്മദ് റിയാസ് പറഞ്ഞു. കേരളത്തിലെ 30,000 കിലോമീറ്റർ പൊതുമരാമത്ത് റോഡുകളിൽ 50 ശതമാനം റോഡുകളും കഴിഞ്ഞ മൂന്നര വർഷത്തിനുള്ളിൽ തന്നെ ബി എം ആൻഡ് ബി സി നിലവാരത്തിലേക്ക് ഉയർത്താനായി.
റോഡുകളുടെ നിർമ്മാണത്തിനായി ചെലവഴിക്കുന്ന പണം പൂർണമായും അതിനായി തന്നെ വിനിയോഗിക്കപ്പെടുന്നുവെന്നും റോഡുകളുടെ നിർമ്മാണത്തിൽ കൃത്യമായ പരിശോധനയും പ്രവർത്തനങ്ങളിൽ സുതാര്യതയും ഉറപ്പുവരുത്താൻ സർക്കാരിന് കഴിയുന്നുവെന്നും മന്ത്രി പറഞ്ഞു.
തെറ്റായ പ്രവണതകൾക്കെതിരെ സർക്കാർ സ്വീകരിക്കുന്ന മുഖം നോക്കാതെയുള്ള നടപടികളുടെ ഭാഗമാണ് ഇത്തരം വികസനമെന്നും മന്ത്രി വ്യക്തമാക്കി.
അരുവിക്കര മണ്ഡലത്തിൽ മാത്രം 25.62 കിലോമീറ്റർ റോഡുകൾ ബി എം ആൻഡ് ബി സി നിലവാരത്തിൽ നവീകരിച്ചിട്ടുണ്ട്. ഇതിനായി 13 കോടി രൂപയാണ് സർക്കാരിന് അധികമായി ചെലവഴിക്കേണ്ടി വന്നത്. സ്വപ്നതുല്യമായ വികസനമാണ് ജി. സ്റ്റീഫൻ എംഎൽഎയുടെ ശ്രമഫലമായി മണ്ഡലത്തിൽ നടന്നതെന്നും മന്ത്രി പറഞ്ഞു.
ഗ്രാമീണ മേഖലയിലെ ജനങ്ങളുടെ വികസനത്തിന് ആകർഷകമായ പദ്ധതിയാണ് മലയോര ഹൈവേ. മലയോര കാർഷിക മേഖലയുടെ കുതിപ്പിനും ടൂറിസം മേഖലയുടെ ഉണർവിനും മലയോര ഹൈവേ പദ്ധതി ഏറെ സഹായം ചെയ്യുമെന്നും മന്ത്രി കൂട്ടിച്ചേർത്തു. മണ്ഡലത്തിന്റെ വികസനത്തിന് എല്ലാവിധ പിന്തുണയും എംഎൽഎക്ക് നൽകുമെന്നും മന്ത്രി പി.എ മുഹമ്മദ് റിയാസ് അറിയിച്ചു.
2023-24 സംസ്ഥാന ബഡ്ജറ്റില്‍ നിന്നും 1.50 കോടി രൂപയാണ് മൈലോട്ടുമൂഴി-ചായ്ക്കുളം റോഡിന്റെ നവീകരണത്തിനായി ചെലവായത്. കാട്ടാക്കട – നെയ്യാര്‍ഡാം റോഡിനേയും മുതിയാവിള – ഒറ്റശേഖരമംഗലം റോഡിനേയും ബന്ധിപ്പിക്കുന്ന പ്രധാന റോഡാണ് മൈലോട്ടുമൂഴി-ചായ്ക്കുളം-ആമച്ചല്‍ റോഡ്. ഈ റോഡിന്റെ 950 മീറ്ററാണ് ബി.എം ആന്‍ഡ് ബി. സി നിലവാരത്തില്‍ നവീകരിച്ചത്.
2022-23 ശബരിമല ഫെസ്റ്റിവല്‍ വര്‍ക്കില്‍ ഉള്‍പ്പെടുത്തി 12.90 കോടി രൂപ ചെലവഴിച്ചാണ് നെട്ടിറച്ചിറ-വെള്ളനാട്-പൂവച്ചല്‍ റോഡ് പുതുക്കി പണിതത്. മണ്ഡലത്തില്‍ പൊതുമരാമത്ത് വകുപ്പിന്റെ അധീനതയിലുള്ള പ്രധാന റോഡ് ആണ് നെട്ടിറച്ചിറ വെള്ളനാട് – പൂവച്ചല്‍ റോഡ്. നെടുമങ്ങാട് -ആര്യനാട് റോഡില്‍ നിന്നും തുടങ്ങി പൂവച്ചലില്‍ അവസാനിക്കുന്ന 11.8 കിലോമീറ്ററാണ് നവീകരിച്ചത്.
അരുവിക്കര നിയോജകമണ്ഡലത്തെയും കാട്ടാക്കട നിയോജകമണ്ഡലത്തെയും ബന്ധിപ്പിക്കുന്ന പ്രധാന റോഡാണ് വെള്ളനാട് കണ്ണമ്പള്ളി-ചേപ്പോട്- മുളയറ റോഡ്. നബാര്‍ഡ് സ്‌കീമില്‍ ഉള്‍പ്പെടുത്തി 2,600 മീറ്ററില്‍ ആറ് കോടി രൂപയുടെ നവീകരണ പ്രവര്‍ത്തനങ്ങളാണ് ഇവിടെ നടത്തിയത്.
റോഡുകളുടെ ഇരുവശത്തും മെറ്റലിട്ട് ബലപ്പെടുത്തി 5.50 മീറ്റര്‍ മുതല്‍ 7.00 മീറ്റര്‍ വീതിയില്‍ 50 എം.എം കനത്തില്‍ ബി.എം, 30 എം.എം കനത്തില്‍ ബി. സി എന്നിവ ചെയ്താണ് നവീകരണ പ്രവര്‍ത്തനങ്ങള്‍ നടത്തിയത്. കൂടാതെ ആവശ്യമായ സ്ഥലങ്ങളില്‍ ഓട, സംരക്ഷണഭിത്തി, കലിങ്കുകള്‍ എന്നിവയും റോഡ് സുരക്ഷക്കാവശ്യമായ മാര്‍ക്കിങ്, സ്റ്റഡ്, ബോര്‍ഡ് എന്നിവയും ചെയ്തിട്ടുണ്ട്.
ചായ്ക്കുളം ജംങ്ഷനിലും വെള്ളനാട് ശ്രീഭദ്ര ഓഡിറ്ററിയത്തിലും നടന്ന ഉദ്ഘാടന ചടങ്ങുകളില്‍ ജി.സ്റ്റീഫന്‍ എം.എല്‍.എ അധ്യക്ഷനായിരുന്നു. വെള്ളനാട് ബ്ലോക്ക് പഞ്ചായത്ത് പ്രസിഡന്റ് എസ്.ഇന്ദുലേഖ, പൂവച്ചല്‍ ഗ്രാമപഞ്ചായത്ത് പ്രസിഡന്റ് റ്റി.സനല്‍കുമാര്‍, വെള്ളനാട് ഗ്രാമപഞ്ചായത്ത് പ്രസിഡന്റ് കെ.എസ് രാജലക്ഷ്മി, ജില്ലാ പഞ്ചായത്തംഗം വെള്ളനാട് ശശി, രാധിക ടീച്ചര്‍, ബ്ലോക്ക്-ഗ്രാമപഞ്ചായത്ത് അംഗങ്ങള്‍ എന്നിവരും പങ്കെടുത്തു.
