ആറ്റിങ്ങൽ: കശാപ്പിനായി കൊണ്ടുവന്ന കാള വിരണ്ടോടി കുത്തി വീഴ്ത്തി ഗുരുതരമായി പരിക്കേറ്റ് ചികിത്സയിൽ കഴിഞ്ഞിരുന്ന വീട്ടമ്മ മരിച്ചു. തോട്ടവാരം രേവതിയിൽ ബിന്ദു (57) ആണ് മരിച്ചത്.
ഇക്കഴിഞ്ഞ തിങ്കളാഴ്ച ഉച്ചയ്ക്ക് 12 മണിയോടെ ആയിരുന്നു സംഭവം. കുഴിമുക്കിൽനിന്നും ഓടിയ കാള കൊല്ലം പുഴ ഭാഗത്ത് എത്തിയപ്പോഴാണ് കാളയെ കീഴടക്കാനായത്. കാളയെ ആറ്റിങ്ങൽ മാർക്കറ്റിലെ അറവുശാലയിൽ കൊണ്ടുവന്നതായിരുന്നു. എന്നാൽ അവിടെനിന്നും റോഡിലൂടെ വിരണ്ടു ഓടിയ കാള വഴിയാത്രക്കാരിയായ ബിന്ദു കുമാരിയെ ഇടിച്ചുതെറിപ്പിക്കുകയായിരുന്നു. ബിന്ദു കുമാരിയെ ഉടൻതന്നെ വലിയകുന്ന് താലൂക്ക് ആശുപത്രിയിലും പിന്നീട് തിരുവനന്തപുരത്തെ സ്വകാര്യ ആശുപത്രിയിലേക്കും മാറ്റിയിരുന്നു
ഓടിയ കാള പിന്നീട് കൊല്ലംപുഴ തിരുവാറാട്ടുകാവ് ക്ഷേത്ര മൈതാനത്ത് എത്തി. അവിടെ നിന്നും ആനപ്പാപ്പാന്റെയും ഫയർഫോഴ്സിന്റെയും സഹായത്തോടെ കാളയെ കുരുക്കിട്ട് പിടിച്ച് തിരികെ ആറ്റിങ്ങൽ മാർക്കറ്റിൽ എത്തിച്ചു. രണ്ടുമണിക്കൂറോളം കഴിഞ്ഞാണ് കാളയെ കീഴ്പ്പെടുത്തിയത്.
