ആറ്റിങ്ങൽ : പ്രശസ്ത സിനിമ സീരിയൽ,നാടക നടൻ കൊച്ചുപ്രേമന്റെ ഓർമ്മക്കായി കൊച്ചുപ്രേമൻ ഫൗണ്ടേഷൻ ഏർപ്പെടുത്തിയ കൊച്ചുപ്രേമൻ സ്മാരക പുരസ്കാരം സീരിയൽ,നാടകനടനും സംവിധായകനുമായ പയ്യന്നൂർമുരളിക്ക് സമ്മാനിച്ചു. ആറ്റിങ്ങൽ മുനിസിപ്പൽ ലൈബ്രറി ഹാളിൽ നടന്ന ചടങ്ങ് നാടക സംവിധായകൻ വക്കം ഷക്കീർ ഉദ്ഘാടനം ചെയ്തു.
പോക്സോ മുൻ സ്പെഷ്യൽ പബ്ലിക്ക് പ്രോസിക്യൂട്ടർ അഡ്വ. എം. മുഹസിൻ അധ്യക്ഷനായി. ചടങ്ങിൽ വിവിധരംഗങ്ങളിലെ പ്രതിഭകളായി തിരഞ്ഞെടുക്കപ്പെട്ട സിനിമ നടൻ ബിജുകലാവേദി, മേളവാദ്യകലാകാരനും മിനിസ്ക്രീൻ അഭിനേതാവുമായ ഗോപൻ എഴക്കാട്, യുവകർഷക സംരംഭകൻ വിഷ്ണു. എസ് എന്നിവർക്ക് സ്നേഹോപഹാരങ്ങൾ നൽകി. പൂജഗ്രൂപ്പ് എം.ഡി സിമി ഇക്ബാൽ പ്രതിഭകളെ ആദരിച്ചു. ഉന്നത വിജയംനേടിയ വിദ്യാർത്ഥികൾക്ക് മഹാത്മാഗാന്ധി സർവ്വകലാശാല ബോർഡ് ഓഫ് സ്റ്റഡീസ് മെമ്പർ ആർ.ജയകുമാരൻ നായർ സമ്മാനങ്ങൾ നൽകി. കവി രാധാകൃഷ്ണൻ കുന്നുംപുറം മുഖ്യപ്രഭാഷണം നടത്തി.
ചടങ്ങിൽ മാധ്യമപ്രവർത്തകർക്കും, വിവിധരംഗങ്ങളിലെ പ്രതിഭകൾക്കും സ്നേഹോപഹാരങ്ങൾ നൽകി. മലബാർ സൗഹൃദവേദി കൺവീനർ ബിജു മോൻപന്തിരുകുലം, കഥാകൃത്ത് കെ രാജേന്ദ്രൻ, പത്രപ്രവർത്തകൻ ബി.എസ് സജിതൻ ടെലിവിഷൻ താരങ്ങളായ അർജ്ജുൻ, കാശിനാഥ് തുടങ്ങിയവർ പങ്കെടുത്തു.
കൺവീനർ ഉദയൻ കലാനികേൻ സ്വാഗതവും വൈസ് പ്രസിഡൻ്റ് സുരേഷ് ബാബു നന്ദിയും പറഞ്ഞു.
