ആറ്റിങ്ങൽ : ഒൻപത് വയസ്സുകാരനോട് ലൈംഗിക അതിക്രമം നടത്തിയ കുറ്റത്തിന് പ്രതിക്ക് 7 വർഷം കഠിന തടവും 50,000/- രൂപ പിഴയും. കുട്ടിയെ സ്വന്തം വീട്ടിലേക്ക് വിളിച്ചു കൊണ്ടുപോയി ലൈംഗിക അതിക്രമത്തിന് വിധേയനാക്കിയെന്ന കുറ്റത്തിനാണ് മനു എന്ന് വിളിപ്പേരുള്ള പ്രശാന്ത് (33) എന്നയാൾക്ക് ആറ്റിങ്ങൽ ഫാസ്റ്റ് ട്രാക്ക് സ്പെഷ്യൽ കോടതി (പോക്സോ) ജഡ്ജ് പ്രഭാഷ് ലാൽ ടി. പി ശിക്ഷ വിധിച്ചത്.
7 വർഷം കഠിന തടവും 50,000/- രൂപ പിഴ തുകയും ശിക്ഷ ഉത്തരവായതിൽ, പ്രതി പിഴ അടയ്ക്കാത്ത പക്ഷം ഒരു വർഷം കൂടി കഠിനതടവ് ശിക്ഷയും വിധി ഉത്തരവിലുണ്ട്. പിഴ ശിക്ഷ തുകയിൽ 25,000/- രൂപ അതിക്രമത്തിനിരയായ കുട്ടിക്ക് നൽകണമെന്നും വിധിന്യായമുണ്ട്.
പ്രോസിക്യൂഷൻ പത്ത് സാക്ഷികളെ വിസ്തരിക്കുകയും പന്ത്രണ്ട് രേഖകളെ ആധാരമാക്കുകയും ചെയ്ത കേസിൽ, മാനസിക അസ്വാസ്ഥ്യം ഉള്ളയാളെന്ന നിലയിൽ കൂടി പ്രതി നിരപരാധിയാണെന്ന പ്രതിഭാഗം വാദം കോടതി തള്ളി.
2015-ൽ കല്ലമ്പലം പോലീസ് രജിസ്റ്റർ ചെയ്ത് കുറ്റപത്രം ഹാജരാക്കിയ കേസിൽ സ്പെഷ്യൽ പബ്ളിക് പ്രോസിക്യൂട്ടർ അഡ്വ.എം.മുഹ്സിൻ പ്രോസിക്യൂഷന് വേണ്ടി ഹാജരായി.
