ക്യാൻസർ രോഗനിർണ്ണയം – ബ്ലോക്ക് പഞ്ചായത്തിൽ ഒക്ടോബർ 2 മുതൽ സർവ്വെയ്ക്കു തുടക്കമാകും.

നമ്മുടെ രാജ്യത്തും പ്രത്യേകിച്ച് കേരളത്തിലും ക്യാൻസർ രോഗികളുടെ എണ്ണം വർദ്ധിച്ചു വരുന്നു.ദേശീയ നിരക്കിനെ അപേക്ഷിച്ച്  4 മടങ്ങ് വർദ്ധനവാണ് കേരളത്തിൽ.വ്യായായ്മ കുറവും ഭക്ഷണ രീതിയിലും പുകയില ഉൽപ്പന്നങ്ങളുടെ അമിത ഉപഭോകവും ഈ രോഗവർദ്ധനവിനു പ്രധാന കാരണങ്ങളിൽപ്പെട്ടവയാണ്. നമ്മുടെ പ്രദേശങ്ങളിലും ഈ രോഗങ്ങൾ വർദ്ധിച്ചു വരുന്ന സാഹചര്യത്തിലാണ് ചിറയിൻകീഴ് ബ്ലോക്ക് പഞ്ചായത്തിന്റെ നേതൃത്വത്തിൽ ക്യാൻസർ രോഗനിർണ്ണയവും പ്രതിരോധ പ്രവർത്തനങ്ങൾക്കും തുടക്കമിടുന്നത്. ബ്ലോക്ക് പഞ്ചായത്തിന്റെ പരിധിയിലെ മുദാക്കൽ, കിഴുവിലം, ചിറയിൻകീഴ്, കടയ്ക്കാവൂർ, അഞ്ചുതെങ്ങ് ,വക്കം എന്നീ 6 പഞ്ചായത്തുകളിലായി 103 വാർഡിലെ അൻപത്തയ്യായിരം വീടുകളിൽ പരിശീലനം ലഭിച്ച ആരോഗ്യ പ്രവർത്തകരെത്തും. വർദ്ധിച്ചു വരുന്ന ക്യാൻസർ രോഗത്തെക്കുറിച്ചുംപ്രാധാന്യ ത്തെക്കുറിച്ചും എല്ലാ പഞ്ചായത്തിലെയും ജനപ്രതിനിധികൾക്കും കുടുംബശ്രീ ഭാരവാഹികൾക്കും ആരോഗ്യ പ്രവർത്തകർക്കും ഇതിനകം പരിശീലനം  നൽകിയിരുന്നു. മഹാത്മാഗാന്ധിയുടെ നൂറ്റിയമ്പതാം ജന്മദിനമായ ഒക്ടോബർ 2 ന് ബ്ലോക്ക് പഞ്ചായത്തിന് സമീപമുള്ള പതിമൂന്നാംവാർഡിലെ അംബികാസദനത്തിൽ നിന്നും സർവ്വെയ്ക്കുതുടക്കം കുറിക്കും. ജനപ്രതിനിധികളും ഡോക്ടർമാരുടെയും ആരോഗ്യ പ്രവർത്തകരുടെയും സാന്നിധ്യത്തിൽ ബ്ലോക്ക് പഞ്ചായത്ത് പ്രസിഡന്റ്  ആർ.സുഭാഷ് ഉദ്ഘാടനം ചെയ്യുമെന്ന് ആരോഗ്യ-വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻ അഞ്ചുതെങ്ങ് സുരേന്ദ്രൻ അറിയിച്ചു.