ആറ്റിങ്ങൽ പാർലമെൻറ് മണ്ഡലത്തിലെ 18.39 കിലോമീറ്റർ ദൂരമുള്ള 3 റോഡുകൾ കൂടി പ്രധാനമന്ത്രി ഗ്രാമീൺ സഡക് യോജന പദ്ധതിയിൽ ഉൾപ്പെടുത്തി നിർമ്മിക്കുന്നതിന് ശുപാർശ ചെയ്തതായി അഡ്വ.അടൂർ പ്രകാശ് എം.പി അറിയിച്ചു. കിളിമാനൂർ, വാമനപുരം, ചിറയിൻകീഴ് ബ്ലോക്ക് പരിധിയിൽ വരുന്ന 15.85 കിലോമീറ്റർ നീളമുള്ള 3 റോഡുകൾ നേരുത്തേ പി. എം. ജി. എസ്. വൈ പദ്ധതിയിൽ ഒന്നാം ഘട്ടമായി ഉൾപ്പെടുത്തിയിരുന്നു. രണ്ടാം ഘട്ടമായി നേമം, വെള്ളനാട് ബ്ലോക്കുകളിൽ ഉൾപ്പെട്ട 18.39 കിലോമീറ്റർ നീളം വരുന്ന 3 റോഡുകളാണ് പുനർനിർമ്മാണം നടത്തുന്നതിനായി ഈ പദ്ധതിയിൽ ഉൾപ്പെടുത്തിയിരിക്കുന്നത്. നേമം ബ്ലോക്കിൽ ഉൾപ്പെട്ട 4.02 കിലോമീറ്റർ നീളം വരുന്ന പിരായിൽകടവ് പാലം – പള്ളിമുക്ക് – പേയാട് -ചേരുപാറ – അരുവിപ്പുറം റോഡും ഇതേ ബ്ലോക്കിൽ ഉൾപ്പെട്ട 5.41 കിലോമീറ്റർ ദൂരം വരുന്ന അരിമല്ലൂർ – തെറ്റാലികുഴി – കുഴിവിള – ആനപ്പാട് റോഡും വെള്ളനാട് ബ്ലോക്കിൽ ഉൾപ്പെട്ട 8.96 കിലോമീറ്റർ ദൂരം വരുന്ന തച്ചൻകോട് – കൊടുകാര – കല്ലയിൽ – നെട്ടുകാൽത്തേരി – പരുത്തിപ്പള്ളി – കല്ലമം റോഡുകളുമാണ് രണ്ടാം ഘട്ടമായി ഈ പദ്ധതിയിൽ ഉൾപ്പെടുത്തിയിരിക്കുന്നത്.ഈ പദ്ധതികളുടെ തുടർ നടപടികൾ പൂർത്തിയാകുന്നതോടെ നിർമാണപ്രവർത്തനങ്ങൾ തുടങ്ങുവാൻ കഴിയുമെന്ന് എം. പി അറിയിച്ചു. ഇതോടെ ആറ്റിങ്ങൽ പാർലമെന്റ് മണ്ഡലത്തിൽ ഈ പദ്ധതിയിൽ രണ്ട് ഘട്ടങ്ങളിലായി വിവിധ ബ്ലോക്ക് പരിധിയിൽ വരുന്ന ആകെ 34.24 കിലോമീറ്റർ നീളമുള്ള ആറു റോഡുകൾ ഉൾപ്പെടുത്തി പുനർനിർമ്മാണത്തിന് ശുപാർശ നൽകിയതായി എം. പി അറിയിച്ചു. പ്രദേശവാസികൾ നൽകിയ പരാതികളുടെയും നിവേദനങ്ങളുടെയും അടിസ്ഥാനത്തിലാണ് ഈ മൂന്ന് റോഡുകളും രണ്ടാം ഘട്ടമായി ഈ പദ്ധതിയിൽ ഉൾപ്പെടുത്തി പുനർനിർമാണം നടത്തുന്നതെന്നും മറ്റു പ്രദേശങ്ങളിലെ റോഡുകളും ഈ പദ്ധതിയിൽ അടുത്ത ഘട്ടത്തിൽ ഉൾപ്പെടുന്നതിനുള്ള നടപടികൾ നടന്നു വരുന്നതായും എം.പി അറിയിച്ചു. തുടർ നടപടികൾ പൂർത്തിയായി ഈ റോഡുകളുടെ നിർമ്മാണം നടക്കുന്നതോടെ ഈ പ്രദേശത്തുള്ളവരുടെ യാത്രാ ബുദ്ധിമുട്ട് ഒരു പരിധിവരെ ഒഴിവായി കിട്ടും എന്ന് എം. പി അറിയിച്ചു.
