ആറ്റിങ്ങൽ: കേരള വ്യാപാരി വ്യവസായി ഏകോപന സമിതി ആറ്റിങ്ങൽ യൂണിറ്റിന്റെ വാർഷിക പൊതുയോഗവും 2026-28 കാലയളവിലേക്കുള്ള ഭരണസമിതി തിരഞ്ഞെടുപ്പും ആവേശകരമായി നടന്നു. ആറ്റിങ്ങൽ സൂര്യ ഹോട്ടലിൽ വച്ച് നടന്ന സമ്മേളനത്തിൽ നിലവിലെ ഭരണസമിതിയെ തന്നെ ഐകകണ്ഠേന വീണ്ടും തിരഞ്ഞെടുത്തു.
യൂണിറ്റ് പ്രസിഡന്റ് പൂജാ ഇക്ബാലിന്റെ അധ്യക്ഷതയിൽ ചേർന്ന യോഗം സംഘടനയുടെ ജില്ലാ പ്രസിഡന്റും സംസ്ഥാന സെക്രട്ടറിയുമായ സി. ധനീഷ് ചന്ദ്രൻ ഉദ്ഘാടനം ചെയ്തു. വ്യാപാരികൾ നേരിടുന്ന വെല്ലുവിളികളും അവയ്ക്കുള്ള പരിഹാരമാർഗ്ഗങ്ങളും ചർച്ച ചെയ്ത ചടങ്ങിൽ, സംഘടനയുടെ ഐക്യം കാത്തുസൂക്ഷിക്കേണ്ടതിന്റെ പ്രാധാന്യം അദ്ദേഹം ഓർമ്മിപ്പിച്ചു.
ജില്ലാ ജനറൽ സെക്രട്ടറി ബി. ജോഷിബാസു, സംസ്ഥാന സെക്രട്ടറി വൈ. വിജയൻ എന്നിവർ മുഖ്യപ്രഭാഷണം നടത്തി.
തുടർന്ന് ഭരണസമിതി തിരഞ്ഞെടുപ്പ് നടപടികൾ ജില്ലാ സെക്രട്ടറിയും മേഖല ജനറൽ സെക്രട്ടറിയുമായ ബി. മുഹമ്മദ് റാഫി വരണാധികാരിയായി നിയന്ത്രിച്ചു.
തിരഞ്ഞെടുപ്പിൽ നിലവിലെ ഭരണസമിതിയിൽ പൂർണ്ണ വിശ്വാസമർപ്പിച്ചുകൊണ്ട് ഭാരവാഹികളെ എതിരില്ലാതെ തിരഞ്ഞെടുത്തു.
നിലവിലെ ഭാരവാഹികളായ പൂജാ ഇക്ബാൽ പ്രസിഡന്റായും, കണ്ണൻ ചന്ദ്രപ്രസ് ജനറൽ സെക്രട്ടറിയായും, ബി. അനിൽകുമാർ ട്രഷററായും തുടരുമെന്ന് ഐക്യകണ്ഠേനയാണ് യോഗം തീരുമാനിച്ചു.
ചടങ്ങിൽ വിവിധ യൂണിറ്റുകളിൽ നിന്നുള്ള ഭാരവാഹികൾ, പ്രമുഖ വ്യാപാരികൾ, സാമൂഹിക-രാഷ്ട്രീയ രംഗത്തെ പ്രമുഖർ എന്നിവർ പങ്കെടുത്തു. ആറ്റിങ്ങൽ യൂണിറ്റിലെ അംഗങ്ങളുടെ സജീവ സാന്നിധ്യം യോഗത്തിന് മാറ്റുകൂട്ടി. സംഘടനയെ കൂടുതൽ കരുത്തുറ്റതാക്കുമെന്നും വ്യാപാരികളുടെ അവകാശങ്ങൾക്കായി മുൻപന്തിയിൽ നിൽക്കുമെന്നും തിരഞ്ഞെടുക്കപ്പെട്ട ഭാരവാഹികൾ അറിയിച്ചു.
