ജൈവ മത്സ്യങ്ങളുടെ ലഭ്യത ഇനി കടയ്ക്കാവൂരിലും

 

കടയ്ക്കാവൂർ :വിഷ രഹിതവും 100 ശതമാനം പരിശുദ്ധിയും ഉറപ്പ് വരുത്തി ആധുനിക സാങ്കേതിവിദ്യയായ ബയോ ഫ്ലോക്ക് സിസ്റ്റത്തിൽ വളർത്തിയെടുത്ത ശുദ്ധജല മത്സ്യങ്ങളുടെ വിളവെടുപ്പും വിപണനത്തിൻ്റെ ഔപചാരിക സമാരംഭവും ആറ്റിങ്ങൽ എം.പി അടൂർ പ്രകാശ് നിർവ്വഹിച്ചു. പഴക്കമേറിയതും രാസവസ്തുക്കൾ കലർത്തിയതുമായ മത്സ്യം മാത്രം പൊതു മാർക്കറ്റിൽ നിന്നും ലഭിമ്പോൾ കടയ്ക്കാവൂർ ഫിഷ് ഫാം വിപണിയിലെത്തിക്കുന്ന ഇത്തരം സംരംഭങ്ങളെ പ്രോത്സാഹിപ്പിക്കേണ്ടതാണ്. ആരോഗ്യമുള്ള ഒരു തലമുറയെ വാർത്തെടുക്കുന്നതിന് ആരോഗ്യമുള്ള ആഹാരം നിർബന്ധമായും ലഭിച്ചിരിക്കണം. അത്തരം ഒരു പരിപാടിയാണ് കടയ്ക്കാവൂർ ഫിഷ് ഫാം നടപ്പിലാക്കിയിരിക്കുന്നത്. ന്യായമായ വിലയിൽ എല്ലാവർക്കും മത്സ്യസമ്പത്ത് ലഭ്യമാകുമെന്നും അടൂർ പ്രകാശ് എം.പി പറഞ്ഞു.

കടയ്ക്കാവൂരിൽ നടന്ന ചടങ്ങിൽ മുൻ പഞ്ചായത്ത് പ്രസിഡണ്ടും നിലവിൽ സ്റ്റാൻഡിംഗ് കമ്മിറ്റി ചെയർപേഴ്സണുമായ ബീനാ രാജീവ് അദ്ധ്യക്ഷയായി.ഡിസിസി സെക്രട്ടറി എം.ജെ.ആനന്ദ്, കോൺഗ്രസ്സ് മണ്ഡലം പ്രസിഡണ്ട് അഡ്വ. റസൂൽ ഷാൻ, പെരുംകുളം അൻസർ. ഫിഷറീസ് ഓഫീസർ ശ്രീമതി ഗീത, ഫാമിൻ്റെ സാരഥികളായ പ്രേംജി പ്രസാദ് മനോജ്.എസ് , ബിനു, ആർ മനു തുടങ്ങിയവർ സംബന്ധിച്ചു.