മംഗലപുരം: മംഗലപുരം- അണ്ടൂർക്കോണം ഗ്രാമ പഞ്ചായത്ത് അതിർത്തി മേഖലയായ ചെറുകായൽക്കര പാലത്തിനടുത്ത് അപകടങ്ങൾ പതിവാകുന്നു. പാലത്തിലേക്ക് പ്രവേശിക്കുന്ന വശത്ത് അപകടകരമായ രീതിയിൽ കോൺക്രീറ്റ് തിട്ടകൾ സ്ഥാപിച്ചതാണ് യാത്രക്കാർക്ക് ഭീഷണിയാകുന്നത്. കഴിഞ്ഞ ദിവസം എതിരെ വന്നത് വാഹനത്തിന് സൈഡ് കൊടുത്ത കാർ ഈ തിട്ടയിൽ ഇടിച്ചു അപകടം സംഭവിച്ചു. വാഹനത്തിന് കേടുപാടും യാത്രക്കാർക്ക് പരിക്കും സംഭവിച്ചു. കഴിഞ്ഞ ഒരാഴ്ചക്കിടെ ഇവിടെ രണ്ടിലധികം അപകടങ്ങൾ നടന്നതായി നാട്ടുകാർ പറയുന്നു. വീതി കുറഞ്ഞ പാലത്തിലേക്ക് വാഹനങ്ങൾ പ്രവേശിക്കുമ്പോൾ എതിരെ വരുന്ന വാഹനത്തിന് സൈഡ് കൊടുക്കാൻ കഴിയാത്ത രീതിയിലാണ് ഈ കോൺക്രീറ്റ് തിട്ടയുള്ളത് എന്നാണ് യാത്രക്കാർ പറയുന്നത്. ഇവിടെ അപകട സൂചന നൽകാൻ റീഫ്ലക്ടർ സംവിധാനവും രാത്രിയിൽ തെരുവ് വിളക്കുകളും ഇല്ല. അധികൃതർ പരിശോധന നടത്തി പരിഹാരമാർഗം കണ്ടെത്തണമെന്ന് നാട്ടുകാർ ആവശ്യപ്പെടുന്നു.