എല്ലാതരത്തിലുള്ള ലഹരികളോടും നോ പറയാൻ കുട്ടികൾ പഠിക്കണമെന്നും രക്ഷകർത്താക്കളും അധ്യാപകരും ഇതിനായി കുട്ടികളെ പ്രാപ്തരാക്കണമെന്നും എക്സൈസ് വകുപ്പ് മന്ത്രി എം.ബി രാജേഷ്.
അന്താരാഷ്ട്ര മയക്കുമരുന്ന് വിരുദ്ധദിനാചരണത്തോടനുബന്ധിച്ച് വിമുക്തി മിഷൻ, പൊതുവിദ്യാഭ്യാസ വകുപ്പിന്റെ സഹകരണത്തോടെ നടത്തുന്ന ബോധവത്കരണ പരിപാടികളുടെ സംസ്ഥാനതല ഉദ്ഘാടനം മണ്ഡലത്തിലെ വെഞ്ഞാറമൂട് ഗവൺമെന്റ് ഹയർസെക്കൻഡറി സ്‌കൂളിൽ നിർവഹിച്ച് സംസാരിക്കുകയായിരുന്നു അദ്ദേഹം.
ലഹരി ഒരു മാരകവിപത്തായി നമുക്ക്
ചുറ്റുമുണ്ട്. അത് പ്രധാനമായും ലക്ഷ്യം
വയ്ക്കുന്നത് കുട്ടികളെയാണ്
പ്രലോഭനങ്ങളിലൂടെ കുട്ടികളെ
ലഹരിക്കടിമാക്കാനുള്ള ശ്രമങ്ങൾ
നടക്കുന്നുണ്ട്. അതിനാൽ
തന്നെ കുട്ടികളുടെ
പെരുമാറ്റത്തിലുണ്ടാകുന്ന അസാധാരണത്വം
രക്ഷകർത്താക്കളും അധ്യാപകരും
ശ്രദ്ധിക്കണം. ലഹരി ഉപയോഗത്തിലെ
ചതിക്കുഴികൾ കുട്ടികൾ തിരിച്ചറിയണം.
സഹപാഠികളാരെങ്കിലും ലഹരി
ഉപയോഗിക്കുന്നതായോ, അപരിചിതരുമായി
ഇടപഴകുന്നതായോ ശ്രദ്ധയിൽപ്പെട്ടാൽ
അക്കാര്യം അധ്യാപകരെ അറിയിക്കണം.
വിദ്യാലയങ്ങളിൽ ലഹരിക്കെതിരായ
ജാഗ്രതാ സമിതികൾ കൃത്യമായി
പ്രവർത്തിക്കുന്നുണ്ടെന്ന് അധ്യാപകരും
ജനപ്രതിനിധികളും കൂടി ഉറപ്പുവരുത്തണം.
പോലീസും എക്സൈസും
ബോധവത്കരണത്തിനൊപ്പം ലഹരി
ഉപയോഗത്തിനെതിരെ ശക്തമായ
നടപടികൾ സ്വീകരിക്കുന്നുണ്ട്.
സ്‌കൂൾ കുട്ടികൾക്കിടയിൽ ലഹരി
വിൽക്കുന്നവരുടെയും സംശയകരമായ
സാഹചര്യത്തിലുള്ളവരുടെയും ഡാറ്റാ ബേസ്
തയാറാക്കിയിട്ടുണ്ട്. ഇവർക്കെതിരെ
ശക്തമായ നടപടി സ്വീകരിക്കും.
വർധിച്ചുവരുന്ന ലഹരി
ഉപയോഗത്തിനെതിരെ
കക്ഷിരാഷ്ട്രീയഭേദ്യമന്യേ എല്ലാവരും
രംഗത്തിറങ്ങണം.
മയക്കുമരുന്ന് വിരുദ്ധദിനത്തിന്റെ ഭാഗമായി
ജൂലായ് ഒന്നുവരെ നീണ്ടുനിൽക്കുന്ന
പ്രചാരണ-ബോധവത്കരണ പരിപാടികളാണ്
വിമുക്തി മിഷന്റെ നേതൃത്വത്തിൽ
നടക്കുന്നത്. ‘ആളുകൾ ആദ്യം, അപമാനവും
വിവേചനവും നിറുത്തുക, പ്രതിരോധം
ശക്തിപ്പെടുത്തുക’ എന്നതാണ്
ഇത്തവണത്തെ പ്രമേയം. കുട്ടികൾ
മയക്കുമരുന്നിന്റെ കെണിയിൽ
അകപ്പെടാതിരിക്കാൻ ആവശ്യമായ
കരുതൽ സ്വീകരിക്കുന്നതിനായി
രക്ഷാകർത്താക്കൾക്ക് ബോധവത്കരണ
ക്ലാസുകൾ നൽകും. വിദ്യാലയങ്ങളിൽ
പ്രത്യേക അസംബ്ലി ചേർന്ന് ലഹരി വിരുദ്ധ പ്രതിജ്ഞയും വിവിധ യൂണിവേഴ്സിറ്റികളിൽ
നിന്നുള്ള ടീമുകളെ പങ്കെടുപ്പിച്ച് സംവാദ
മത്സരവും നടത്തുന്നുണ്ട്.
സംസ്ഥാനതല ഉദ്ഘാടനത്തോടനുബന്ധിച്ച് വിദ്യാർത്ഥികൾ അവതരിപ്പിച്ച വിവിധ കലാപരിപാടികൾ, ഡാരിയസ് മിതൃമ്മല അവതരിപ്പിച്ച മാജിക്, പുല്ലമ്പാറ ചങ്ങാതിക്കൂട്ടം കുട്ടികളുടെ തിയേറ്റർ അവതരിപ്പിച്ച ലഹരി വിരുദ്ധ ഡോക്യുഡ്രാമ എന്നിവ അരങ്ങേറി.
അന്താരാഷ്ട്രലഹരിവിരുദ്ധ ദിനത്തോടനുബന്ധിച്ച് തിരുവനന്തപുരം വിമുക്തി മിഷൻ തയ്യാറാക്കിയ _ജീവിച്ചീടുക_ എന്ന സംഗീത ആൽബം ബഹു തദ്ദേശ സ്വയംഭരണ – എക്സൈസ് വകുപ്പ് മന്ത്രി എം ബി രാജേഷ് എക്സൈസ് കമ്മീഷണർ മഹിപാൽ യാദവ് ഐ.പി.എസ് -ന് നൽകി പ്രകാശനം ചെയ്തു.
ചടങ്ങിൽ വാമനപുരം ബ്ലോക്ക് പഞ്ചായത്ത്
പ്രസിഡന്റ് ജി. കോമളം, ത്രിതല പഞ്ചായത്ത്
പ്രതിനിധികൾ, എക്സൈസ് കമ്മിഷണർ
മഹിപാൽ യാദവ്, ജോയന്റ് എക്സൈസ്
കമ്മിഷണർ ഗോപകുമാർ.ആർ, വിവിധ
വകുപ്പുകളിലെ ഉദ്യോഗസ്ഥർ,
വിദ്യാർത്ഥികൾ, രാഷ്ട്രീയ-സാംസ്‌കാരിക
രംഗത്തെ പ്രമുഖർ എന്നിവരും പങ്കെടുത്തു.
