കല്ലറ: ജൂൺ 5 ലോക പരിസ്ഥിതി ദിനത്തോടനുബന്ധിച്ച് ഹെർക്കുലീസ് മോഡൽ സ്കൂളിൽ വിപുലമായ പരിപാടികളോടെ പരിസ്ഥിതി ദിനം ആചരിച്ചു.
പരിസ്ഥിതി സംരക്ഷണത്തിന്റെ പ്രാധാന്യം കുട്ടികളിലേക്ക് എത്തിക്കുക എന്ന ലക്ഷ്യത്തോടെ വൈവിധ്യമാർന്ന മത്സരങ്ങളും ബോധവൽക്കരണ പരിപാടികളുമാണ് സ്കൂളിൽ സംഘടിപ്പിച്ചത്.
ദിനാചരണത്തിന്റെ ഭാഗമായി വിദ്യാർത്ഥികൾക്കായി പരിസ്ഥിതി സംരക്ഷണവുമായി ബന്ധപ്പെട്ട് പ്രത്യേക സെമിനാറും, ക്വിസ് കോമ്പറ്റീഷൻ, സ്റ്റോറി റെസിറ്റേഷൻ (കഥാപാരായണം), ഡ്രോയിങ് (ചിത്രരചന) തുടങ്ങിയ മത്സരങ്ങളും നടന്നു. കുട്ടികൾ ഏറെ ആവേശത്തോടെയാണ് മത്സരങ്ങളിൽ പങ്കെടുത്തത്.
സ്കൂൾ പരിസരത്ത് നടന്ന ചടങ്ങിൽ സ്കൂൾ മാനേജർ എ. ജെ. നൗഷാദ് സാർ വിദ്യാർത്ഥികൾക്ക് വൃക്ഷത്തൈ നൽകിക്കൊണ്ട് പരിസ്ഥിതി ദിനാചരണ പരിപാടികൾ ഉദ്ഘാടനം ചെയ്തു. തുടർന്ന് പ്രകൃതിയെ സംരക്ഷിക്കേണ്ടത് ഓരോരുത്തരുടെയും കടമയാണെന്ന് അദ്ദേഹം ഓർമ്മിപ്പിച്ചു. സ്കൂൾ അഡ്മിനിസ്ട്രേറ്റീവ് ഓഫീസർ വിജി മാമിൽ നിന്നും ഓരോ ക്ലാസിലെയും വിദ്യാർത്ഥികളും ക്ലാസ് ടീച്ചർമാരും ചേർന്ന് വൃക്ഷത്തൈകൾ ഏറ്റുവാങ്ങി.
തുടർന്ന് നടന്ന ചടങ്ങിൽ സ്കൂൾ വൈസ് പ്രിൻസിപ്പൽ നിഷാദ് സാർ വിദ്യാർത്ഥികൾക്കായി പരിസ്ഥിതി ബോധവൽക്കരണ സന്ദേശം നൽകി. മാറിക്കൊണ്ടിരിക്കുന്ന കാലാവസ്ഥയിലും പ്രകൃതിയെ കരുതലോടെ സംരക്ഷിക്കേണ്ടതിന്റെ ആവശ്യകതയെക്കുറിച്ച് അദ്ദേഹം കുട്ടികളോട് സംസാരിച്ചു.
ഉദ്ഘാടന ചടങ്ങുകൾക്ക് ശേഷം സ്കൂൾ മാനേജർ നൗഷാദ് സാറും വിദ്യാർത്ഥികളും ചേർന്ന് സ്കൂൾ പരിസരത്ത് വൃക്ഷത്തൈകൾ നട്ടുപിടിപ്പിച്ചു. പരിസ്ഥിതി ദിനാചരണത്തിന്റെ ഭാഗമായി നടന്ന ഈ ഹരിത പരിപാടിയിൽ സ്കൂളിലെ അധ്യാപകർ, മറ്റ് ജീവനക്കാർ, രക്ഷിതാക്കൾ എന്നിവർ പങ്കെടുത്തു. വരും ദിവസങ്ങളിലും ഈ തൈകൾ സംരക്ഷിക്കുമെന്ന ഉറപ്പോടെയാണ് വിദ്യാർത്ഥികൾ പരിപാടികൾ അവസാനിപ്പിച്ചത്.
