വെഞ്ഞാറമൂട് :പരിസ്ഥിതി ദിനങ്ങൾ കടന്നുപോകുന്നു. ഓരോ വർഷവും ലക്ഷക്കണക്കിന് വൃക്ഷത്തൈകൾ നാടിന്റെ വിവിധ ഭാഗങ്ങളിൽ നട്ടുപിടിപ്പിക്കപ്പെടുന്നു. എന്നാൽ, നട്ട തൈകളിൽ എത്രയെണ്ണം വളർന്ന് മരങ്ങളാകുന്നു എന്ന ചോദ്യം പലപ്പോഴും ബാക്കിയാണ്. വൃക്ഷത്തൈ നടുന്നതിനെക്കാൾ പ്രധാനമാണ് അവയെ പരിപാലിച്ച് വളർത്തുക എന്ന സന്ദേശം ഉയർത്തിപ്പിടിക്കുകയാണ് വെഞ്ഞാറമൂട് ജീവകല.
2018-ൽ വെഞ്ഞാറമൂട് കെ.എസ്.ആർ.ടി.സി ഡിപ്പോ പരിസരത്ത് നട്ട താളി ഇനത്തിൽപ്പെട്ട നാട്ടുമാവ് ഇന്ന് വളർന്ന് കായ്ച്ചുതുടങ്ങിയിരിക്കുകയാണ്. വർഷങ്ങളോളം അതിനെ സംരക്ഷിച്ചും പരിപാലിച്ചും പോന്ന ജീവകല പ്രവർത്തകരുടെ പരിശ്രമത്തിന്റെ ഫലമാണ് ഈ മരം.
കുറ്റിമൂട് സ്വദേശി ശ്രീകണ്ഠൻ സമ്മാനിച്ച മാവിൻതൈയാണ് 2018-ൽ ഡിപ്പോ പരിസരത്ത് നട്ടത്. ഒരു തൈ നട്ടതോടെ ഉത്തരവാദിത്വം അവസാനിക്കുന്നില്ലെന്ന തിരിച്ചറിവോടെ ജീവകല പ്രവർത്തകർ മാവിനെ സംരക്ഷിച്ചു. ഇന്ന് ആ മാവ് കായ്ച്ചുതുടങ്ങിയതോടെ എട്ട് വർഷം മുമ്പ് നട്ട ഒരു ചെറിയ തൈയുടെ വളർച്ചയുടെ കഥ കൂടിയാണ് ഇവിടെ കാണാനാകുന്നത്.
മാവിൽ മാത്രം ഒതുങ്ങുന്നതല്ല ജീവകലയുടെ ഈ ഹരിതപരിപാലനം. കറിവേപ്പില തൈകളും നട്ട് സംരക്ഷിച്ച് വളർത്തുന്നുണ്ട്. പരിസ്ഥിതി സംരക്ഷണം ഒരു ദിവസത്തെ ആചരണമായി മാറാതെ ദൈനംദിന ഉത്തരവാദിത്വമായി ഏറ്റെടുക്കണമെന്ന സന്ദേശമാണ് ഇതിലൂടെ സംഘടന മുന്നോട്ടുവയ്ക്കുന്നത്.
ഈ മാതൃകയെ പ്രോത്സാഹിപ്പിക്കുന്നതിന്റെ ഭാഗമായി കെ.എസ്.ആർ.ടി.സി ഡിപ്പോ പരിസരത്ത് നാട്ടുമാവിനെ ആദരിക്കുന്ന ചടങ്ങും ജീവകല സംഘടിപ്പിച്ചു. നെല്ലനാട് ഗ്രാമ പഞ്ചായത്ത് പ്രസിഡന്റ് കെ. ബാബുരാജ് ചടങ്ങ് ഉദ്ഘാടനം ചെയ്തു. കൃഷി അസിസ്റ്റന്റ് ഓഫീസർ ബിന്ദു, എ.ടി.ഒ ഗിരീഷ് കുമാർ എന്നിവർ സംസാരിച്ചു.
ജീവകല സെക്രട്ടറി വി.എസ്. ബിജുകുമാർ, ജോയിന്റ് സെക്രട്ടറി പി. മധു, ട്രഷറർ പി. മോഹൻദാസ് എന്നിവർ നേതൃത്വം നൽകി.
ഒരു ദിവസം നട്ട തൈയെ വർഷങ്ങളോളം കരുതലോടെ വളർത്തി, അത് കായ്ച്ച് നിൽക്കുന്ന മരമായി കാണുന്നതാണ് യഥാർഥ പരിസ്ഥിതി പ്രവർത്തനം. വൃക്ഷത്തൈകൾ നട്ടുപിടിപ്പിക്കുന്നതിന്റെ എണ്ണം മാത്രമല്ല, അവയിൽ എത്രയെണ്ണം മരങ്ങളായി വളർന്നു എന്നതും കണക്കാക്കപ്പെടേണ്ട കാലമാണിത്. വെഞ്ഞാറമൂട്ടിലെ ഈ നാട്ടുമാവ് അതിന് ഒരു ഉദാഹരണമായി നിലകൊള്ളുന്നു.
